MATTHEW媽的生活

話說之前因退租的緣故多了一筆錢，所以決定去台灣~

雖然得果3日2夜(因為我同王生都唔係好趕啲人，所以每次都會安排5日4夜以上)，但我地都已經好開心啦~

再加上我而家咁既身世，又唔行得遠同走得遠~仲要成日都好眼訓~

同埋基本上台北的景點我地都差唔多去過~今次最主要都係過去行一行鬆一鬆~

雖然食得唔多，飲唔到好多野~(我竟然飲唔到我最愛的茶~恨阿！)，但我都好開心~

今次終於都去埋睇女王頭啦，我每次去台灣都會plan去，但每次都去唔成~

我驚再唔去睇，佢會斷啦~囧

之後要成一、兩年後先有得再去旅行啦~

台灣，I WILL MISS U！

一直都好鍾意去台灣，基本上近這兩、三年都會每年同王生去一次~

自從知道有左阿b之後王生就話暫時唔再去旅行~

但人真係有啲犯賤，越係知道唔得個心就會越想~

於是不斷同王生講我好想去台灣阿！

每次王生都會好無奈咁同我講，你而家唔去得阿，為左阿b你忍耐吓啦~

跟住我每次聽完後都會扁嘴~

之‧但‧係估唔到竟然有轉機喎~

之前咪話我同王生為左阿b的緣故由天水圍搬返出市區~

最後我地揀左藍田，可以行到去大家原來的屋企~

但係，搬左入去先發覺間屋好唔得囉~

詳細情況費事講啦，反正到最後我地決定退租，因為真係住唔落去~

同包租婆講，佢雖然可惜但都俾我地退租，真係感謝神~

就係咁，我地決定用退租番黎的錢開心一下~而咁啱又有假期喎~

所以我地決定去台灣啦，咁當然係詢問過醫生可唔可以去先啦~

YEAH！可以去台灣啦~10月3日後見啦~XD

今日又見到阿b啦，佢大過左好多阿，己經有8.02cm啦

陳醫生話遲啲就唔可以度到阿b既全長~

今次都有睇吓睇唔睇到阿b既性別

大致上都睇到，但係要等下一個月先確認，到時先話俾大家知啦~

照果時阿b動來動去，超活躍的呢~

唔知係我錯覺定點，我最近有感覺到阿b的郁動，好輕微，好似俾橡筋彈咗一下咁

問返啲有經驗人仕，都話3個月都會開始有啲感覺架啦~

雖然感覺俾橡筋彈的次數唔算太多，但我的母愛開始氾濫啦~

唔知係咪因為之前一直都感覺唔到阿b，成日都好怕自己係咪幻想有咗或者突然冇啦啦咁冇咗~(詳情可睇擔心一文)

而家耐唔時都會感覺到俾橡筋彈，所以開始有真實既感覺存在，對肚中的小生命越來越愛，覺得為佢做咩都得~

希望阿b出世後，我唔會太過寵佢啦~

睇啲育嬰書，知道8個星期大就可以聽到bb的心跳

於是咪叫王生聽吓，睇吓聽唔聽到

點知王生一直都冇試，到最近先開始試

聽左一陣先聽到

王生話好多水聲，唔係好大聲，要好專心先聽得到

王生話佢都係鍾意把脈多啲喎~XD

又自從知道可以聽到阿b既心跳後

我耐唔時都會叫王生聽吓~

不過好快俾王生識穿左~

我一叫王生聽心跳，王生都會話你又驚阿，你驚先會叫我聽心跳~

每次佢咁講時我都會傻笑，因為我真係驚就會叫王生聽心跳~

希望可以快啲感覺到阿b郁啦，咁我就冇驚~

(其實最好快啲生出黎，唔駛驚黎驚去)

我最近唔知點解變得好驚阿

可能又未感覺到胎動，唔知阿B係咪真係存在啦

成日都得自己係咪真係有左架

又成日都好驚會唔會突然間流產

又擔心會唔會突然胎死胎中

每次咁樣同王生講時都會俾王生鬧痴線

王生話我地有神保守，唔駛咁擔心喎，你咁咪即係對神冇信心，再加上，你知唔知語言係有能力架，係成日都咁諗，最後真係會變真！

王生講完之後都會把一把脈，因為有左的脈象同冇的脈象係唔同的

把完脈後都會同我講仲係好有力阿，冇事喎，怕咩即，唔信你自己把下喇

就係咁，俾王生鬧完後我又冇咁驚喇喎

仲有一驚就祈禱，個心就定啲

我真係要好好咁倚靠神啦~

養一個細路真係唔平

加上我又睇中醫同埋私家醫生~

個價錢真係好犀利…

而家每個月都要用成差唔多2千蚊去睇醫生

未出世已經要用咁多錢，出左世更加多阿

真係好擔心架，不過我同王生都深信神賜左產業俾我地的話，必定會為我們去預備的

希望我地都努力學習這個信心的功課

終於等到再去陳醫生度啦~

之前好心急想快啲到，因為可以睇吓阿b同知道阿b預產期係幾時~

陳醫生話今日可以嘗試吓照肚睇吓睇唔睇到~

好開心阿，照肚照到阿，而且仲已經見到阿b的手腳，雖然得果2.78cm，但成個型都出左黎啦~

而且陳醫生仲話發展得好好~

陳醫生話暫時照都係懷左一個，冇兩個胎盤~

雖然我好想生龍鳳胎，一次過搞掂，唔駛咁煩嘛~

但而家有一個都好感恩家啦~最緊要佢健康成長就得~

見到有個生命係自己肚裏面，果種感覺真係好奇妙，唔知點形容~

希望阿b健康成長啦~

~

本來我同王生諗住夠3個月先同老爺奶奶我媽佢地講~

一來我老爺奶奶佢地好迷信，費事未夠3個月時同佢地講，有咩事就賴我地~

二來係我馱得唔太穩定，驚會有咩意外，太早講大家會空歡喜一場

但係到有左成7星期左右時，奶奶打電話黎同我地講話王生的婆婆心臟有事入左院，叫我地去探佢~

王生聽完個電話就好煩惱啦，因為而家豬流感好勁，好似我而家特別身世平時都要小心啲為妙，更何況要去醫院呢啲咁多病菌既地方~

但係唔去既話奶奶一定會嘈~

我地考慮左一陣後決定同我奶奶講我有左~

我同王生仲要係搭車返天水圍時先打俾我奶奶同佢講我地唔去探婆婆啦~

王生一打俾奶奶話唔去探婆婆時，奶奶果然好大聲咁鬧啦~

但係王生一講話我有左時，奶奶即刻180度轉變，好溫柔咁問有左耐，情況點等

又話今日唔好探婆婆啦，搵日王生自己上去探婆婆啦~

收左線後王生有啲慶，因為奶奶未聽完佢講就鬧人

不過奶奶前後的語氣真係好好笑~

點都好啦，而家老爺奶奶知道啦，陳媽媽果度就等我幾時再通知佢啦~

P.S.後來收返黎消息係我老爺一知道我有左就笑到見牙唔見眼，連續幾日都笑笑口，冇點黑面過~

其實本來係邊度生都冇問題的~

陳媽媽同我講係邊度生都冇所謂啦，你估住好耐咩~

如果順產既話，都係住果2、3日，頂多俾你住多1、2日~

所以我都諗是但啦，去聯合度生都ok，反正我的地址都係要去聯合~

之但係，好死唔死咁俾我係網上睇到啲好恐怖啲野~

於是我同王生講︰「好驚阿！我唔想去聯合生阿，我地去廣華生啦好唔好？」

王生當然冇意見啦，生果個係我唔係佢嘛~

我拿拿臨問阿怡借個地址黎用啦~然後打電話問廣華果邊呢個地址係咪可以係度生~

勁感恩阿，個地址可以係廣華度生~

而且奶奶同我講，原來王生都係係廣華度生家~

真係好啦，咁樣就變得好有意思啦~

之後去左廣華度登記，第一次檢查要10月5日先有得做~

好在有去私家度檢查咋，如果唔係吓吓都要等成咁耐先有得檢查，我一定心急死~

寶寶︰

媽媽今天見到你了，像一粒豆那樣的彈來彈去，但可是你好少喔，只有3mm大，不過爸媽都很開心，因為終於可以跟你見面了~^^

爸爸今天也看見你了，我想他開心吧，而且今天媽媽看的那個醫生很好呢，佷細心又很讓爸爸媽媽放心，爸爸說都會繼續找她幫寶寶你檢查的，我們已經約了陳醫生三星期後再見你了~^^

寶寶，爸媽已經決定了在公立醫院生產了，真的要謝謝契媽借地址給媽媽，媽媽才能在心儀的廣華醫院生下你~^^

今天爸媽也去了黃醫生那邊，不過今次看你的是黃醫生的兒子，我們就叫他細黃醫生吧~(笑)

細黃醫生說你發展得很好，會繼續幫媽媽補一補胎氣，讓寶寶你更穩定，雖然藥很苦，可是為了寶寶好，媽媽也會忍耐喝下去的！

寶寶，爸媽今天已經找到地方搬了，是在藍田，不過租金比爸媽想像中要貴呢~(吐舌)

但因為很近婆婆和嫲嫲家，用走的都很快走到，所以租金雖然有點貴，為了日後方便帶寶寶去婆婆和嫲嫲家吃飯，爸媽都決定租下來，盼望可以住上幾年，畢竟搬屋是一件很麻煩的事=口=

媽媽要睡了，晚安~(飛吻)

祝　健康成長！

愛你的媽媽

20-7-2009