MATTHEW媽的生活

感恩Matthew算係鍾意祈禱

由初初唔知咩叫祈禱，到而家知道祈禱係同天父爸爸傾計

祈禱係要合埋手同最後要講阿們，係差在未合到埋眼

有時Matthew都會主動咁叫我地同佢祈禱，佢會自己捉住我隻手，然後叫阿爸阿爸

初時我地都唔知佢係想祈禱架，仲同佢講爸爸咪係度或者做緊咩咁~

Matthew會搖頭，之後叫阿爸阿爸，咁我地又會重複講爸爸咪係度或者做緊咩~

如是者重複左幾次，Matthew開始忟，會好大聲咁叫阿爸阿爸爸

跟住我地又開始忟，因為唔知佢想點=.=

後來聖靈突然提醒我，可能佢係想同天父講野~

於是我吸啖氣，平靜落黎，然後問佢係咪想同天父爸爸傾計？

Matthew即刻靜落黎點頭~咁我同王生就同佢一齊祈禱~

之後佢再叫阿爸果時，我地就知道佢係想祈禱

(因為我地教佢叫天父做天父爸爸，而之前都講過佢會自己用唔同叫法去分別啲人，

佢唔想搞錯爸爸同天父爸爸，所以叫王生做爸爸，天父做阿爸)

Matthew試過自己開聲祈禱架(暫時都係得一次)，果刻我真係想喊~

我成日都同Matthew講，你幾時想同天父爸爸傾計都得架，天父爸爸都會聽架，

而且就算你講BB話，天父爸爸都一定知道你講咩~

爸爸媽媽有時都唔知BB想講咩，但天父爸爸佢一定知道，因為係佢創造你的~

事緣︰有次係婆婆屋企，樓上裝修，成日都有啲轉牆聲(Matthew好怕呢啲轉野聲)，

令到Matthew瞓唔到覺，於是我同佢講我地祈禱啊，同天父爸爸講佢就會令到你唔驚架啦~

咁我就同佢祈禱啦，一祈完，轉牆聲就停左啦

Matthew用好驚訝的表情望住我，我就成機同佢講，

係啊，天父爸爸好勁架，只要你同佢講就得架啦~所以你下次驚果時就祈禱~

過左一陣又有轉牆聲，我又同Matthew祈禱，祈完轉牆聲又停左，我又同Matthew講驚果時就祈禱~

到下一次轉牆聲時，我就話不如你自己試下同天父爸爸講啊，講完講阿們就得架啦，

Matthew真係講左啲BB話後就講阿們！

果刻我真係好開心同感動，因為Matthew真係經歷到神的信實，所以佢知道同神講一定有用~

Matthew祈禱係要一家人一齊祈架，即係祈禱時佢一定要我同王生同佢一齊祈，

少一個都唔得(當然如果得是但一個時就冇計啦)

如果王生做緊其他野，佢會好大聲叫爸爸，要佢立即過黎同佢一齊祈禱~XDD

盼望Matthew到大個果時都會持續咁祈禱，緊緊的倚靠神

隨著Matthew過左2歲大關，問生第二個呢個問題暴增！

其實生第二個呢個問題，我同王生真係有好認真咁傾過

生第二個起碼要等到Matthew讀書後先考慮，因為到時大個啲，起碼會知發生咩事，

唔會好似感覺啲人突然唔理佢咁

大個啲又可以幫下手，佢自己又可以打理一下自己，咁我又可以專心啲照顧個細既

再加上我同王生都比較自私，現階段黎講，我地都只係想專心啲咁對Matthew，想好好咁寵佢，

唔想讓另一個小朋友瓜分左我地對佢的愛住，所以生第二個真係未有咁早

王生話其實一個真係好夠，如果唔係怕佢會寂寞同到我地百年歸老時冇人同佢商量，

佢唔考慮生第二個，跟住有啲人同佢講話，咁係因為你生左個仔先咁講，

王生就話唔係，原本係想要女架

哈哈~係啊，呢個我可以做證，王生當初真係想要女，只不過後來證明左係仔先無奈咁接受咋~

同埋都係果個無敵答案啦，我仲後生，真係過多3、5、7年先再生都未遲，

亦都未到高齡產婦的定義~=v=

所以大家唔駛問啦，生第二個真係會生既(因我坐月唔好，點都要生多一個調理返個身體)，

總知現階段唔會考慮住啦~

又好耐都冇更新~orz|||

除左因為一家人輪流病之外，Matthew的戰鬥力突然暴增，每晚都要搞到成12點幾1點先黎瞓，哄得佢瞓時，我自己都瞓著左嚕…

係去完韓國先叫早瞓返啲~(不過都係夜架啦(汗))

我決定不定期咁出Matthew成長紀錄

因Matthew大了，都需要放多啲時間俾佢~(當然主因係我懶啦(吐舌))

講返Matthew係呢2個月的成長先

牙仔出得七七八八

但每次一出都會扭到不得了，因為而家出都係大牙(好痕但又抓唔到)

繼續黏媽症

亦開始出現黏爸症(王生洋洋得意中)

講多左好多野

尤其係一踏入2歲，語言能力突然增強了不少

開始會有組織句子的出現，不再是單詞

算係好乖仔

會扭計，但會叫得停

而且當知道人地真係嬲或唔鍾意時會收歛

有時都係會控制唔到打人，不過開始睇人黎打

而家最常打太婆、婆婆(不過婆婆係會還手的，然後Matthew會呆左XD)、爸爸(跟住爸爸就會講，你做咩打我，我唔同你玩啦，然後又係呆左)

但當話佢時，佢自己會知衰

通常會有2個反應出現，一個係咋喊，要尋求人的安慰

呢招通常會出現係有老人家在場的場合

老人家通常會呵返佢，咁你就會見到Matthew露出得戚的笑容~*口*

另一個反應係份冇野，左言右顧的

扮冇呢回事，轉移話題

好鍾意跳，所以生得好高

出街成日都俾人誤會成3歲大

王生對此有啲唔開心，因為人地會話咩咁大個仲要人抱或食奶嘴之類的話

呢個時候，王生就會話︰「有幾大啊？2歲都未到(而家就會話先剛2歲)，而家唔抱，咁幾時先抱？！」

之後啲人就會默默的不出聲~

基本上，我同王生都覺得Matthew越大越乖，可能係開始會講得明，希望之後可以繼續健康開心，好好的倚靠神成長。

出緊大牙，十分扭

感恩有2隻已經爆左出黎，仲有2隻出緊

所以佢好牙㾗，成日將啲手指放落口度當係牙刷咁擦個口

之但係佢隻手又會四圍咁摸，唔俾人抺就放入口，搞到時不時都會肚屙

都仲係唔肯叫人

唔知點解特別抗拒叫叔叔同uncle

不過見到女性會叫既機率大好多，尤其係後生的女性（笑）

那~呢個好明顯絕對係王生的遺傳啦~（茶）

根據一些前輩的意見，大多是不能迫，要順其自然，大大下就會叫的了

我記得細個果時如果唔叫人，陳媽媽同陳爸爸就企到你肯叫為止，甚至會有動手，但時代真係變啦，而家仲邊有呢支歌仔唱

唔知係咪異性相吸的緣故，Matthew係超級黏我的

觀乎身邊的人，如果係生仔的話，大都黏媽媽的，不過大到一定歲數就會黏爸爸，唔會再咁黏媽媽

我個人都幾期待呢日的來臨，雖然會失落一陣，但唔駛好似而家咁困身，去個廁所都搞到好似生離死別咁啊~

王生有啲失落，因為佢走開的話，Matthew無太多所謂，但我走的話就會喊同唔俾我走

不過而家有時王生走都會唔俾佢走，令王生冇咁唔平衡~(笑)

開始會自己讀數字同一啲英文字

我同王生冇刻意教佢，見到佢望或指先會同佢講下(都真係講下就算)

總知我地係抱住順其自然的心態，唔會要佢贏在起跑線上

我同王生都覺得成世人流流長，要學的話慌冇得學咩，但能夠無憂無慮的就只要這2-3年，咁點解唔俾佢好好咁享受這段日子呢？

我地都深信，天父會為Matthew安排最好的路

而且讀書呢家野都好講佢自己既，無興趣的，點迫都冇用的，有興趣，唔迫都會讀的

等天氣回暖時，會同佢戒片，希望可以係入學前同佢戒左佢

開始會怕羞，不肯叫人

話說這令我跟王生很頭痛，愈要他叫愈不肯叫，其實係唔係到左呢個年紀都係咁？

有冇前輩可以分享下？

我同王生變左動物

Matthew而家會好嗲咁叫我做咩咩，王生做bear bear

佢會用佢自己的方法去分辨點叫人，好似：契媽=阿媽，契爺=阿爺，咁就唔會同爺爺媽媽搞亂

成日都唔記得講，Matthew有項特性，由幾個月大就開始有

就係出街時會點名丫，未識講野時，佢會周圍望下啲人係唔係度，到識講野就開口叫

有幾多人一齊出街，佢會逐個叫名，行到咁上下又會點名留意下你係唔係度，有冇走失到，除非你話俾佢知你走啦，同佢講byebye，咁佢就會再點你名啦

超搞笑，不過都好，咁起碼表示佢會顧住啲人

開始出大牙，變得十分扭計

晩上又會因出牙的緣故瞓得唔好，連帶我同王生都一樣瞓得唔好

開始唔太鍾意飲奶，固體食物食多左

超鍾意食面類，有面的話會唔食飯

飯的話，鍾意食菜飯多過白飯

鍾意食包，尤其係馬拉糕，饅頭之類，去飲茶總會叫2、3款包俾佢食

又鍾意食腸粉（當然係冇餡的），蛋類食物都鍾意

超級無敵鍾意食魚，陳媽媽試過一邊拆魚肉一邊餵，足足食左半條(係大魚類)以上

開始好鍾意飲湯，基本上老人家因呢個原因，每日都會煲湯或滾湯俾佢飲

超級無敵鍾意食藍莓、提子同柚子（不過柚子只限自家種植的，舅公同姨婆有自己的柚子田，所以陳媽媽每次返大陸時都會攞成十幾個返黎俾佢個心肝掟）

其他生果都鍾意食，好似橙、蘋果、柑、梨、士多啤梨等，暫時係奇異果麻麻

宇宙無敵鍾意食零食

好似餅乾、芝士、yoga、啫哩、粟米片等，特別鍾意食糖（只限軟糖，硬糖仲未識食）

飲品方面嘗試俾牛奶同果汁（儘量係新鮮或現榨）佢飲

仍然係鍾意女性，無視所有男性物體（王生的陰暗遺傳基因）

大家都同我講話可以完全唔駛擔心佢的性取向（笑）

宇宙無敵鍾意車、angry
birds、魚同球類物體

車的話，最愛的士同地鐵，之後係小巴，巴士同私家車

angry birds唔駛講啦，一見到有關angry birds啲野就要扭你買，屋企快要被angry birds淪陷啦~

魚的話，不論真定假，帶佢去街巿魚檔睇下佢都會好開心

十分之活躍，無時停

去到公園不得了，捉佢唔住，完全失控

都算係一個守諾言的人

事前同佢約定好的話，大致上都願遵行(當然循例會扭一扭啦)

好似帶佢去公園同佢講定幾時要走，佢都會肯走的

總知你同佢約法三章的話，佢都會遵行的

我而家成日人講樣就遺傳到雙方好的部份，點解性格就遺傳左雙方唔好的部份？真係完全體驗到何謂世界並不會完全如你意~(茶)

我同王生希望佢唔好病咁多、肯叫人、講多啲野同唔好咁倔強~

當初是因要做功課才看，但看完後覺得值得推薦給所有作父母的人看！

如果是基督徒的話更好，因作者也是基督徒，在書中常會引用經文鼓勵父母，又會勸勉父母將小孩的問題擺上給神。

當中作者舉了一些父母常會覺得頭痛難搞的行為，在當中分析行為背後的目的、心態、情緒等，而父母又該用甚麼面貌面對、用甚麼樣的話語，用甚麼心態面對

我覺得作者分析得很透徹，而提供的方法也很實用而又易行

作者會舉出很多例子去說明，不會讓人看完後覺得只是理論空談，很難實行

最重要是作者本身緊靠神的話語去教導孩子讓我很受鼓舞

其實單看背頁簡介已讓我很有興趣去閱讀，若大家有興趣的話不訪買來看

書名︰積極的管教—認識及掌握子女的行為

作者︰譚孫德棻博士

出版社︰香港萬國兒童佈道團有限公司

絕對值得推薦，不過建議大家家外賣回家

因它本身的位置是在工廠大廈裡頭，座位是像大排擋形式那樣，不是坐得那麼舒服(容納人數也不多，只要4-5張枱)，而因是室內的緣故，如果碰巧你隔離係一大班人係度慶祝或者怎樣的話，當場就會變得很嘈吵，聽不到別人說話(我當天食飯就遇到這情況，嘈到大家都頭痛=.=)，如果想邊食飯邊聊又的話就不合適囉~

冰醉瀨尿蝦

超好食，一隻差不多一隻筷子長，好大隻

啲肉好鮮甜，有好淡的酒香味，啲酒味唔會令人覺得好嗆，反而更加食出瀨尿蝦的鮮味

呢味餸係要早一日預訂的，當初訂時，陳媽媽還說瀨尿蝦不是椒鹽的邊會好食阿，但最後佢不斷話好食~

我地5個人(加埋Mattew有6個人)，叫左8隻(王生對蝦敏感，冇份，Matthew未食得)，每人2隻，得家姐一個食到一隻有膏，不過有冇膏都咁好食

 

豉椒炒蜆

好食，豉椒味啱啱好，唔會太搶，又唔會唔夠味

蜆都好鮮，老闆仲同我地講，啲蜆合埋口既唔係冇肉架，海蜆係咁架，炒完有時會自己合返埋個口，我地夾黎食又真係有肉喎~

 

自家製义燒

我地都覺得味道比較甜，送飯食都OK既

陳媽媽又話咁咪同佢自己整义燒差唔多，佢覺得自己整得好食啲喎~XD

 

椒鹽墨魚咀

椒鹽味比較重，唔係咁食到墨魚咀啲味~

不過啲椒鹽真係好惹味，而且真係有啲辣架~

 

泰式燒烏頭

好好食，尤其係啱晒王生呢啲唔識食魚既人，啖啖肉，冇咩骨

網上有人覺得啲肉燒得稍乾，但我地又覺得OK，可能我地鍾意食乾身啲掛~

而且Matthew都可以食，仲食左成碗阿~^^

老闆又同我地講佢地燒得比出面好好多，我絕對認同

佢地會有一碗仔的青檸汁另上俾你點魚食，啲味夾到不得了~

諗起都想再食過阿！

 

糯米釀雞翼

呢味餸佢地話好好食，好香同脆口

我因胃炎的緣故唔敢點食，剩係食左一啖，不過已經覺得好好食

糯米夠乾身，雞翼啲皮又脆

可惜我食唔到太多~

 

啫啫芥蘭煲

好食，夠惹味，菜唔會苦，很爽甜

初食第一口覺得咸同苦，因佢用咸魚一齊煮~

可能我夾左底啲黎食，又未撈得勻，所以覺得咸同苦，撈勻左就好好食

不過陳爸爸就麻麻，佢覺得唔應該用咸魚去煮喎~

 

錦繡花枝丸

好食，又脆又彈牙

點沙律醬食一流

 

腐竹薏米皂角米糖水

好飲，好滑又潤，皂角米煙煙韌韌咁

老闆又俾左張皂角米單張俾我地，俾我地知道係咩

 

最後我地都話好飽阿，老闆同佢個女(應該係女吧，因睇網上話係家庭經營)都話梗係啦，你地得5個人叫咁多餸，佢個女又話打電話黎訂果時都話左唔駛叫咁多餸架啦~(因我同佢講我地戰鬥力高強唔駛擔心)

之後我同佢講，如果唔係陳媽媽佢地出門口前食左好多野同食左個粽(因為我訂左8點，但平時陳媽媽佢地食開6點幾)，今日應該係冇餸剩囉~佢地即刻好大聲叫左出黎話︰「食左個粽？！」然後O左嘴囉~

我諗佢地俾我地大食嚇親左~

 

總括黎講好值得推薦，美中不足既係果日佢地好忙(有外賣，我眼見得3個人做)，搞到有啲餸遲上(特別係錦繡花枝丸，等左好耐，等到陳爸爸頂唔順返左屋企)

又加上有圍枱啲人超嘈，成間店都不停迴盪佢地啲講野聲~令到大家耳仔好唔舒服~

再加上我胃炎，有啲野食唔得太多，飲恨阿！！！

 

陳媽媽她們說會再食，不過外賣返屋企食，反正好近

是晚消費差不多$1300，因食海鮮緣故，如唔食海鮮的話，價錢不會這麼貴~

 

好運強記食堂

地址 :

觀塘成業街19-21號成業工業大厦2樓26室

電話 : 2389 6756

繼續古古惑惑，以為人地唔知佢做咩~

繼續易炆，易發脾氣同尖叫，不過話佢會知錯

發完脾氣打完人會知錯呵返你

做錯野後會轉移你的視線或話題讓你們不再談論佢~

明知果樣野唔做得或食得時(通常都係食物)，會用好可憐的眼光同語氣叫你，不只叫一次，係會叫三次以上~

繼續BB話

開始有一句句的句子出現，不過都係BB話~

識的字越來越多，教幾次就可以講到~(當然指成日見同簡單發音的)

不過可能係還未可以好清楚咁表達自己，所以可能是造成特別易炆的原因之一

超級鍾意angry bird，有時發開口夢或要醒未醒之祭會叫住bird bird

又鍾意talking tom、talking ben(都係iphone game)，仲有鍾意睇變身男女chock chock chock 個開頭~

成日都會拿住我地部iphone或ipad話要睇bird bird、貓貓(talking tom)、汪汪(talking ben)等~

自從王生買左部ipad 俾我做生日禮物後，Matthew的視線由iphone移到ipad，成日都吼住我部ipad~=口=

又好鍾意啲化妝品廣告，成日會模仿~

(同王生研究過，發現化妝品廣告全部都係女性，所以佢好鍾意睇，王生話完全係將佢既陰暗面表露無遺~XD)

開始有羞恥心出現

不喜歡人地話佢，會阻止人去話佢同笑佢(包括鄒住眉叫你，用手摀住的嘴巴等行為)

開始怕羞(有時係專登扮野)

要佢叫人時會扮伯羞躲在你的懷裡

或見人地想同佢講野或玩時會躲在我們身後~

開始聽指令，踏入一個好幫手時段

叫佢幫手做野會好願意

成日都會主動咁幫你手(當然幫倒忙多~XD)

成日〝借刀殺人〞

明明自己可以做到，卻硬要拉住人地的手去幫佢做(好似開電視、要人幫佢攞野等)

好好好為食

一見我地食野就會跑過黎講一輪野等你俾佢食

唔俾會發脾氣

或硬拉你的手去餵佢

情緒表現開始變得明顯同清晰

讓我同王生都要小心的處理

19個月人仔，長得特別高，出街成日都俾人誤會為2歲幾，令我同王生都很無奈~

今個月都算多病，睇左幾次醫生，發左人生第一次高燒，盼望佢之後繼續健康開心成長~^^

Matthew 9月30日(請容許我記下日子)嘗試了人生的第一次高燒，不是說他沒發過燒，但他是第一次發到39.7 / 39.8度，差不多去到40度，全身都紅通通，而且會嘔，讓我跟王生都很擔心和心痛

最心痛的是他不斷哭喊著媽媽，而自己看他這麼辛苦又幫不了他時，眼淚真的流下，個心赤赤痛阿…

睇完醫生，醫生說是感染了少許感冒菌，消化系統受到影響，所以會嘔，食慾會變少，儘量少吃多餐，這些症狀會持續2-3日

開了些藥物，感恩是Matthew食完了退燒藥後退燒了~

這次Matthew生病令我覺得父母原來真的可以為了孩子忍受/做很多東西~何解會這樣說？

當他嘔到整個床跟你身上都是嘔吐物時，你第一時間不是擔心床單怎樣難處理，不是處理自己身上的嘔吐物，而是第一時間抱起他安撫他，不論他是否全身都是嘔吐物，將他安頓後，你還要頂著嘔吐物的酸臭味處理受災情影響的物件，然後才處理自己…

而當以為他沒事時，他又再嘔，仲要嘔在你落地不到2天的iPad時，你第一時間還是先處理他，抱起他安撫他，又是將他安頓好後才頂著酸臭味處理受災情影響的物件和自己…

生病中的小朋友總睡不好，常會驚醒哭起來，跟王生還是得忍受倦意哄他入睡，沒隔多久又哭起來…

生病中的小朋友特別的扭計，在睡眠不足下，榨盡你僅餘的耐性好好安撫他…

更不說小朋友生病時，父母擔心、自責(怪自己沒照顧好)之類的那種複雜心情…

感恩天父爸爸讓王生剛好放長假可以陪伴Matthew~

辛苦你啦王生~

向所有父母致敬，特別是孩子是有特殊需要的，因你們所付出的一定比其他人多上很多很多~^^