MATTHEW媽的生活

重3.2KG

入左產房後，啲護士話我唔可以再吸笑氣，要收走~

OMG！咁點得，我痛到死左咁制，收走笑氣，痛得咪仲勁！

我搖頭，係咁吸笑氣，然後個護士就話，俾你吸多陣啦~

吸多陣後，護士真係收左樽笑氣阿！！！

之後就幫我整左兩條貓鬚俾我，跟住就走左~留返一個護士係度留意我~

我果時都唔知做咩，又痛同之前吸笑氣吸到wing wing地，而且又覺得好攰~好想瞓~於是我就係半睡半昏迷的情況等

等待期間當然有不斷想屙的感覺，反正都推左入產房，咁唔駛就力啦~所以一有想屙的感覺，我都會用力咁谷~

期間聽到護士話唔知係我快定隔離房生得快啲~

有啲就話我，有啲就話隔離房(因為佢已經開始接生緊)

期間唔係記得咁清楚，因為我都半睡半昏迷~

我剩係知道果個留意我的護士入埋黎檢查我的下面時就話生得啦~跟住叫其他護士黎~

然後問我知唔知我陰道有塊肉？我話知，其中有個護士講話我知，係入院時佢自己有講~

個護士同我講，你塊肉阻住生，而家要同你剪左佢~

我點頭，覺得咩都好啦，快啲，好痛好辛苦阿~

佢地話要同我打麻醉針先，打落去時，啲護士叫我唔好用力，係咪想斷針？

護士又問我先生係唔係陪產，我話係~護士就話咁我而家叫你先生入黎~

啲護士一剪左塊肉就話見到個頭~好搞笑係佢地叫我唔好用力住，先生入緊黎家啦~

但我邊控制到，我剩係想快啲生完冇咁痛咋~於是我係咁搖頭同用力~(個情景應該幾搞笑)

感恩王生趕得切見到我生，佢一入黎就過黎握住我隻手~

跟住我用力一推，個頭就出黎，我再用多一、兩下力，身都出埋黎~

之後聽到一陣喊聲後我喊左，覺得終於都完成任務啦~王生都有眼濕濕~

其實之後都唔係好記得~因為一放鬆晒就好眼瞓~

剩係記得生完後就叫返王生出去等，啲護士就幫我攞返個胎盤出黎同縫傷口~

幫我縫傷口個護士仲問我把聲係唔係原本就係咁(我因為感冒，把聲變左，而且咁耐冇飲水，又用力，成把聲拆晒、好低啞)，我就話唔係，我係感冒，個護士就話喔，我仲以為你把聲咁sex添~

跟住又同我講話，見我等生時明明擴張得好好，用力又用得好好，點解咁耐都未生得，於是檢查下，先發覺我陰道有塊肉卡住係阿B個頭中間，所以阿B出唔到黎~

佢話見過有啲人都有，但冇我咁中間，而且生果時就會退埋一邊，唔影響生，但我就卡住左係阿B個頭中間，所以要剪~仲有你個囝出黎果時拿住條天地線(即係之前駁入去聽心跳條野)，唔肯出黎，如果唔係咁，你應該會好快生~

之後我就迷迷糊糊陷入睡眠中~

護士抱阿B入黎俾我睇，問我我先生係唔係外國人，我話唔係，佢話阿B啲輪廓好深，雙眼皮好深~

又俾我餵媽媽奶，之後我就抱住阿囝等入房間啦~

打左催生針一陣後，陣痛即刻密左~痛到我係張床度係咁碌黎碌去~

護士過黎check bb心跳時發覺冇左心跳~check一check先發現原來係綁係肚上面果條繩太鬆，於是佢地同我講話要駁條線入去陰道直接聽bb心跳~

駁完後，我開始覺得越黎越痛~

護士又黎check 時，我忍唔住同個護士講，好痛阿，可唔可以打止痛針阿？

個護士同我講，咁快你就要打止痛針，仲有排喎，我俾笑氣你聞啦~

跟住護士俾樽笑氣我聞~

我果時仲記得唔好咁快吸，如果唔係到後期就唔work，止唔到痛~(雖然到後期咩都唔記得，癲左咁喪吸)

所以我初頭都唔係咁吸，但隨住越黎越痛，我真係頂唔順啦，我開始不斷咁吸~

之後我覺得我好想去大便，於是同個護士講，但個護士同我講係因為bb個頭落緊黎，所以你會想去大便，但係唔係架~護士仲教我點用呼吸法減輕痛楚~

我用左呼吸法一陣都係覺得好痛，同埋想屙屎~

於是我又同個護士講︰「唔係呢，我真係想屙呢。」(已經開始痛到有啲頂唔順)

個護士就話︰「都話唔係囉，果個係bb個頭黎架，你咁用力谷的話，bb個頭會變型架！你痛果時就吸啖笑氣，仲有阿，你唔好用口吸氣啦，用個鼻阿！」

我就答佢我唔係想用口呼吸架，但係我感冒鼻塞用唔到果鼻呼吸阿~

護士就話鼻塞都儘量用鼻呼吸，如果唔係等陣會嘔架！

點個護士講完冇幾耐，我真係嘔阿！

不過嘔左又好似舒服啲咁~

我不斷感到我想屙屎於是我係咁話我想屙屎阿~

護士過黎話你唔好谷阿，你咁谷，bb個頭會變形架！你知唔知每次用力谷時，bb個心跳就會慢左架！

我話唔係阿，我真的好想屙阿！

個護士問我係唔係真係好想屙，我答完佢係之後，佢幫我check個子宮頸，然後話我仲未生得住~叫我努力下同埋唔好再谷~如果唔係bb有危險~

隨住越黎越痛，我係咁吸笑氣(吸到wing wing地)~

過左一陣，我已經痛到神智不清，仲不斷感覺到有好多水係下面流出黎~

同埋有啲野係肛門度咇左出黎，於是我大叫我要屙阿！

個護士走過黎好大聲同有啲惡咁叫我個名，話我仲未生得住，同咁谷法會令到個bb受傷同有危險！

但我發晒癲咁搖頭話唔係阿，我真係好想屙呢，你俾我屙啦！

個護士望一望我下面，即刻推左我入產房~

一個人瞓係張床度，綁住個儀器check
BB心跳同子宮收縮，仲有個制俾我揸住，等BB一郁時就按一下~

個心情係又緊張又期待又徬徨，總知要幾複雜就有幾複雜啦~

而且成間待產房得我一個人咋~王生又唔可以陪我~再加上我又唔舒服~

所以我都唔知點好，可以點做~

因為吃左藥的綠故好想瞓，但係又好緊張瞓唔到，於是閉上眼休息，個心就不斷係度祈禱，希望自己能夠頂得順生果時的痛苦~

等等下又有一個等生既媽媽推入黎，之後我聽到一陣慘烈的叫聲，我個心驚一驚，更加努力咁祈禱~(因為我係一個好怕痛的人)

就係有時有啲慘叫聲的情況下，我閉上眼休息一陣又打開眼一陣~

等阿等，等到我想噓噓，同護士講啦，點知佢俾左個尿盆我~

我無言左，但冇辦法啦，急起上黎都要用家，但…但係唔知係唔係唔慣又緊張的關係，我去唔到阿！！

咁我唯有繼續我閉上眼休息一陣又打開眼一陣的等生之旅~

一路都有護士過黎check住，之後突然有個醫生過黎check果時同我講，bb既心跳慢左，我地而家決定同你穿水同打催生針~

我一聽到個心即刻好慌，王生又唔係度，我更加唔知點算好~但冇辦法，為個b好係一定要做家啦~

個醫生就繼續同我講穿左水打左針後會有啲咩風險，跟住就俾張紙我簽，話我已經知道有咩風險阿咁~

簽完張紙後，護士同我有咩止痛方法，但係因為係星期六冇得打無痛分娩，可以用的只有呼吸法、運動球、聞笑氣同打止痛針，之後俾個電話我叫我打俾老公同佢講情況，話我一胎冇咁快生得，叫佢可以返屋企等下先，生得再過黎~

同王生講完後個醫生就同我穿水，護士就準備打針的工具，跟住我feel到有啲痛後一股水流出黎~再跟住我見到護士攞住支好長又有啲粗既針~

我心裡面即刻諗唔係要吉落黎阿~

而且我知道自己本身啲血管好難搵，所以每次抽血或打針都要花啲啲時間，咁長同粗的針如果吉左落去但吉唔到入血案咪會好痛囉！

果然！個護士吉左落去搵唔到條血管，要撩一撩先插到~

但插完後佢講既野令到我有啲驚，個護士話唔係睇得好清楚，我都係靠估咋！

嘩！感恩既係吉到啫，如果唔係…我唔敢諗阿！

我一直都想留多啲產假係後面，唔想太早放，因為我自己冇咩假(雖則本身都唔多)，同埋想留多啲時湊阿B，俾自己多啲時間適應，所以我揀左放前一後九~

好多人都話咁遲先放，有咩事點算~

但因為我屋企同公司俾盡佢都係得果10分鐘路程，有咩事起上黎返屋企攞走佬袋都好快，所以我都冇驚過~

到我正式放產假阿B都未出黎，不過之前一、兩日已經開始有假陣痛，搞到我有啲緊張，畢竟人哋都係第一次生仔嘛~

都唔知好彩定唔好彩，我一放假就病左嚕~仲要病足成個禮拜都未好~我好驚到阿b要出世時我仲病緊，我怕冇力生阿~

但到最後我都係未好返就生左阿b，感恩的是都有力生~而且很快就生左啦~

呢日我都係唔舒服，咪再去睇睇醫生，想個病快啲好~

其實上午果時王生已不斷叫我去睇醫生，但因為我有啲陣痛既感覺，唔係咁想郁，所以我話睇下點先啦~

點知下午果時我去廁所發現左一大灘啫哩狀的物體帶啲啡，好驚阿，拿拿臨打俾阿媽問佢，阿媽話係分泌黎~唔駛理~

嘩~佢咁答咪等如冇講過，我咪再打俾人問下，個朋友話應該係見紅，可以再留意多一陣，因為得見紅的話，去醫院都可能叫你返屋企等~

咁咪再睇下點，之後又有啫哩狀的物體同有啲紅~於是我咪拿拿臨咁去睇醫生，費時真係要生果時冇力生~

等睇醫生期間，王生打去俾奶奶話今晚我唔係太舒服唔去食啦，點知奶奶話佢專登買左幾百蚊既料打邊爐補祝王生的生日喎~

咁咪唯有去啦，但我個肚冇停過痛，仲好似有越來越痛的感覺~

快快趣食完，快啲返屋企休息~返到屋企沖涼上床瞓覺，點知個肚係咁痛~

本來諗住都應該忍到第朝，咪同王生講瞓啦~(因為佢個樣超眼瞓)~但我瞓低冇幾耐後真係痛到頂唔順，所以同王生講都係去醫院~

落到街，一片漆黑，我同王生既心情都有啲緊張~

等左一陣見冇的士唯有忍痛咁行，行下停下(仲係用龜速行)之下終於截到的士啦~

係的士裡面痛得密左，自己不斷咁做呼吸運動~

去到廣華，登記入院後就上到待產房，跟住有護士出黎問我情況係點~

咁我就同佢講見同埋幾分鐘有一次陣痛，之後個護士就同我講︰「係家啦，生得家啦，你換左件衫佢啦。」

於是我換左件衫，攞左我需要的物品(其實只係產婦衛生巾)，就自己一個人瞓係張床度等生~

(王生係冇得入去架，佢只係可以等我到換完件入院衫，攞埋需要用的物品就要出返去~)

我一個人有啲驚有啲徬徨(總知心情好複雜)之下瞓係張床等夠度數生~

想知詳情下回再分解~^^

今日時間都好趕下，一早要上堂，之後要去陳醫生度檢查，檢查完又約左阿筠去探Kitty，探完Kitty後要去長沙灣攞相~

去陳醫生度檢查，今次係最後一次係肚裡面見到阿B個樣啦~

阿B大得好快阿，已經見唔到佢個樣啦，陳醫生話佢趴左係度等出世，所以想睇下佢個樣都睇唔到~

唔知係唔係因為新年成日都係度瞓既緣故啦，不夠一個月，阿B竟然由5磅幾飆升到7磅幾~

咁樣唔知到佢出世時會有幾重，希望可以順產生到啦~

見完阿B就去同阿筠會合食飯，食完後就去銅鑼灣探Kitty~

探完Kitty後就去長沙灣攞相啦~

去到後，王生話算啦，唔想揀，俾$600攞走晒啲相算啦~於是俾左$600走晒啲相~

啲相影得都OK既，可能係我太肥啦，所以仲係覺得唔係太好睇啦~

整理完啲相再po上黎俾大家睇~

我一路都冇咩點寫過去政府醫院檢查的過程，因為我覺得冇咩好寫~

次次都要等好耐，每次入到去都係聽心跳，按下個肚，之後醫生問有冇問題，如果冇就走得~

我知道政府醫院人手不夠，等得耐都正常，我同王生都冇話啲咩~

廣華都算好好架啦，咁多人，啲姑娘同醫生都冇咩點發脾氣，態度都算好好~

不過如果大家經濟上可以負擔得起的話，我建議大家每月可以睇一次私家醫生囉，因為政府醫院唔會同你點照超聲波架~(我除左照結構之外都未照過)

咁樣起碼每個月都見到阿B一次嘛~

但係今次不得不投訴一下~

我都知每逢假期過後，門診實會爆多人(係真係要用爆多人黎形容，因為去到係會冇位坐)

但今次我係等左成3個鍾頭以上囉，係我之後黎啲媽媽都睇完走左，得我一個仲係度等~

唔知係唔係原定話我要睇果間房既醫生做唔切啦(好慢囉，其他房睇十個，佢先睇第三個)，所以最後我要睇一間房的醫生~

唔知係唔係要執埋果個醫生的手尾，加上呢日真係爆多人的緣故，個醫生窿口窿臉~

一入到去就叫我除褲上床，檢查心跳，按下果肚，之後落番床，我就攞左份B型鏈球菌的報告俾果醫生睇~

點知個醫生就話我唔一早同佢講，又話我早左驗唔準，而家又要上床驗多次之類~

喂~大佬阿，我一入黎你就叫我上床，我邊有時間同你講阿~

但係就係呢件事令到王生好興囉，佢話睇咁多次最差都係呢次，仲話下一胎儲錢去私家生，唔駛受氣~

點都好啦，今次可能太忙先咁啦，加上可能今次睇個醫生都好後生，難免冇咁好耐性啦~希望下次睇唔會又遇到咁差的醫生啦

今日收到陳醫生果邊打黎話報告出左啦，我有少少的B型鏈球菌~

姑娘話如果要攞報告就要今日攞，因為佢地之後放年假，要到年初七先開工~

感謝主今日都冇咩特別野要做，所以可以早走得，咁我咪拿拿臨趕去尖沙咀度攞報告~

上網睇過有經驗的媽媽話唔係咁大問題，一係之前俾啲抗生素你食，一係生果時幫你打抗生素~

睇到都冇咁驚，希望到時可以順順利利咁生阿B出黎啦~

超級好笑

1.雞毛掃 此兵器柔中帶剛，狠勁異常，手握處又有天然雞毛製作的防滑系統，既能吸收打仔過於激烈而滲透出黎的手汗，又能起到保護手部的作用，且能夠消除擊中衰仔後嘅回震~防止手磨出泡或者過滑。不得不提嘅系佢價格便宜，便於收藏，實在系居家旅行，打仔出氣必備武器。 雞毛掃實可稱為打仔兵器之首！



2、拖鞋（或同門武器：鞋） 攻擊範圍窄，威力大，反應速度快，聲音效果震撼，系追唔上嘅情況下仲可以做暗器，而且可以二連發。 百年曆久不衰兵器



3、皮帶隨身攜帶，一抽即有，而且鞭鞭有力，多年來叫眾多英雄豪傑聞聲喪膽。 簡直就係必備暗器



4、衫架 此武器重3兩 、長40公分，雖然輕，但打得系最痛，而且速度快。非專業被虐待人士實在難以躲避，系師奶打仔必備架撐！各大超市均有發售。 記得留翻幾個黎晾衫



5、飛搖控器隨手羅到，而且飛個陣，電池會跟住飛出，命中率高，殺傷力高。由於成本過高不推薦使用，買定一打後備遙控做兵器比較好，原裝無保修



6、開片竹支（70－80公分長，開片長20公分） 攻擊範圍廣，威力大，靈活，而且一舉兩得，系打嘅同時仲有將肉夾起嘅作用，效果只會出現一遍紅腫，唔會有藤條印。 80後開始絕跡



7、柴 速度中等，威力大，表面唔光滑，可以當狼牙棒用，不過依家呢種武器已經絕跡。 70後專用



8、如果實屬情急之時，又無兵器在手，這時我建議各位家長修煉“ 兜巴星” 此招陰險，出招快且狠，通常會以配合口中七十二式鬧仔法增加氣勢和威力。個衰仔準備駁嘴嘅時候，以出奇不易的角度，氣運丹田，同衰仔塊面夾角成45度左右出招掌摑其面部（夾角為180度時，此招POWER MIX），同時使出左右互刮，增加HIT數，並且口中大叫：“駁嘴吖哪，駁吖哪。”增加此招的氣勢及華麗程度！