MATTHEW媽的生活

原本打算今次係最後一次見阿B，但係陳醫生話見多一次隱陣啲，咁我地就book多次啦，所以呢次係臨尾一次見阿B~

今次最主要係要檢查陰道有冇B型鏈球菌，因為我係打算順產，而阿B經過陰道時有機會會感染到，所以要check一check~

今次用4D照阿B，都仲見到個樣，雖然有啲逼，不過都好清楚，而且睇落阿B都係有啲肉地咁喎，包包臉~

阿B話咁快都重左好多，有成5磅幾啦(不過今次重係我身上多啲囉)

我盼望阿B出世時有6磅幾已經好開心同滿足啦~

陳醫生仲話阿B有幾多頭髮~

哈哈~不愧我之前強逼自己食左咁多芝麻糊~

我本身一啲都唔鍾意食芝麻糊之類的糊類甜品，但知道有左後都強逼自己食下(雖然食芝麻糊溝紅豆沙，剩芝麻糊食唔到)，我同王生都好想阿B出世時多啲頭髮，因為我同王生細個果時都唔係有太多頭髮~

總知希望阿B可以順利出世，個化驗報告正常啦~

其實一直都想去影大肚相，因為想記錄低人生的過程嘛~

再加上第一次懷孕喎，點都想有啲特別啲野啦~

於是同王生講啦，但佢好似唔多贊成去影喎~

冇辦法啦，唯有放棄啦，冇理由自己一個去影~我會怕羞架~

哈哈~但係之後教會有個姊妹影左，俾我地睇，而且話個價錢唔係好貴~於是我又嗲王生去影~

今次王生冇反對喎，拿拿臨去搵studio啦~

最後揀左一間叫studio
123的攝影公司，他們的價錢都不算太貴，$888，加多$600就可以全部相片都拿走

就係咁啦，呢日我地就去左影大肚相~

去到要化妝，我差啲瞓著左啦~(王生當然都係啦)

化好左妝，揀衫，咁我差唔多全部都係揀左露肚的衫，因為今次都係想留個紀念，所以幾大都揀露肚啦，始終我都算係一個保守的人，如果唔係懷孕，我諗我唔會影咁露的相~

王生話個攝影師唔係咁好玩，所以玩得唔係咁盡興啦~不過算係咁啦

影左2、3個鐘到啦，感覺好似影婚紗相咁~一樣好累~

要到2月27日先可以睇到啲相，都幾期待睇到啲相，希望好睇啦~

今日又係見阿B的日子，但係超級趕囉~

話說，我book產檢都會提早成2個月之前book定，因為陳醫生果度好full架，尤其係你要星期六睇既話，所以要早成2個月book定~

哈~但係冇諗到呢日竟然彬蔚同佳恩結婚的大日子

原本都冇咩問題既，但…但…原來王生係要做兄弟

於是只好將原本係早上的booking改做下午啦~

但係冇諗到既係我地之前睇果個人睇勁耐囉，早知我地就食埋野先上去啦，咁就唔駛王生冇得食野，而我就要外賣走~

(因為王生要幫彬蔚佳恩的婚禮彈野阿，所以要趕住返去)

最後好趕咁睇完，好趕咁買完吉野家，就由尖沙咀飛的返觀塘~

唉~今次可能係等得太耐又肚餓既緣故，照果時阿b瞓著左啦，而且照果時阿b都好似好唔耐煩咁，好炆咁~

今次見唔到阿b既樣，好唔開心阿~

希望下次可以見到啦~

一直我同王生都冇去點買過BB仔用品，我頂多買左一個睡袋俾阿B~

就係得咁多，冇啦~因為有朋友同教會有弟兄姊妹話俾啲野我地，我地唔駛買咁多，所以我同王生都好大安旨意咁唔買野住~

但隨住時間，個肚越黎越大，加上好多人都問我地買齊野未時，我同王生先開始覺得係喎，係時候都要買啲野啦~

一來，王生驚我個肚再大啲時唔方便啦，二來，我有一日竟然發夢阿B會係2月22日出世，俾預產期早左成2個星期，我怕阿B會早出世~

諗諗下都係早少少買野，就算阿B早出世都唔駛拿手唔作世嘛~

就係咁啦，呢日我地就同準契爺契媽同胡氏夫婦一齊去買BB野，再加上知道今日有個outlet係最後一日，所以就揀左呢日去啦~

但係好搞笑咁，我地搵左好耐先搵到個outlet位置囉~

嘩~買左幾樣BB野已經要成3百幾蚊啦，仲要係特價左，BB仔野真係好鬼貴~

之後去睇BB車，嘩~仲貴~

不過感恩既係之後搵到一架做緊特價既BB車，而且個款仲要係同我地想要既差唔多，即刻扑搥買啦~

係度真係要再一次多謝準契爺契媽同胡氏夫婦送左架BB車俾我地~

太好啦，我終於都飲完糖水啦

實在太難飲啦，唔明點解有人會覺得好飲~

對我黎講，抽血唔係一個問題~問題係冇得飲水同食野~

食野都勉強忍受到(雖然肚餓對大肚婆黎講好難受)，但最最辛苦既係冇得飲水啊！！！尤其是忍受12個鐘頭以上！！！

我平時講幾講野就要飲一啖水濕濕口，而家竟然要咁耐唔飲得水，簡直係完全想死阿！

不過感謝神啦，我做完兩次都冇嘔到，如果唔係要做多次架~

但係，我都要好多謝王生，因為佢真係好錫我，佢知道我要禁水禁食，佢就陪一齊咁耐唔飲唔食，兩次都係咁~

我個心真係幾甜架，知道自己冇揀錯老公嘛~

王生，多謝你咁有義氣，令我有能力捱得過驗血糖呢關~

最重要都係要多謝神的保守令我兩次飲糖水都一take過啦~

今次知道會見到阿B既樣，所我地早一、兩日已經不斷同阿B講叫佢乖阿，俾個靚仔樣我地睇~

阿B真係好聽話咁俾個樣我地睇~

陳醫生話我個胎盤遮住佢半個樣，但佢都好醒咁搵到個位俾我地睇佢個樣~(3分2個樣啦~)

陳醫生話同佢訓話係有用既~

哎呀，阿仔，吔你個鼻同你老豆一樣係兩截架~嘴又似我咁大~囧

好彩你係男仔咋，如果係女仔就唔好睇啦~

輪廓都幾深，眼大大咁，希望下次見你時個樣會更清楚啦~

不過今次姑娘唔記得幫我地開機錄阿，所以冇DVD留念~

不過唔緊要啦，因為今次個樣都唔算好清楚同靚仔~

下次希望姑娘會記得開機錄啦~

一直都冇抽筋的我，終於抽筋啦~

好彩奶奶一早就同我講一抽筋既話只要企落地下就得啦~

一企落地真係唔抽喎~

好神奇阿，大家有抽筋時都可以試下~

雖然唔抽，但係都係有啲抽抽地既感覺~

王生即時幫我拉筋，按一按，之後就繼續瞓

原來抽筋都幾辛苦，而且第二日隻腳都唔係咁舒服

希望之後都唔會點抽筋啦~

今日又係去陳醫生度見阿B的日子~

因為我地約左10點鐘，所以我同王生好早就出左去~

點知我地去樓下果時，姑娘打黎話陳醫生臨時有個病人要接生，所以啲booking要推後~囧

咁唯有同王生佢搵個地方坐住等，最後我地買左份報紙同雜誌去左burger king度坐~(burger king的早餐都幾好吃)

坐到咁上下時間就慢慢行返去陳醫生度，上到去陳醫生都仲未返到~唯有等係度等啦~

跟住等左一陣，陳醫生返到黎啦，但係我地都要等其他係果段時間睇的孕婦睇完先到我地~

等阿等，終於到我地啦~

唔知係咪等得太耐，阿B佢唔耐煩瞓著左~

搞到今次睇唔到佢個樣，佢雙手放左係塊臉上面阿~

希望下次照果時可以見到佢個樣啦~

之前話過感覺到個肚好似俾橡筋了彈左彈既感覺~

一直都唔敢肯定係唔係胎動~

但~呢次我好肯定啦~

因為我放隻手係果肚度時，好明顯咁震左震~

王生係之後果幾日終於感受到~開心得佢阿~

佢話遲啲要同阿b give me
five 咁話喎~

但係之後佢摸親阿b都唔郁~

胎動真係一種好奇妙既感覺，好難去形容~

總知好開心啦~

話咁快就到5個月啦~今日又去陳醫生度見阿B啦~

阿B真係大個左好多阿~

個頭仲有啲大添，係大頭B阿~而且手長腳長~(同王生一樣)

今次好明顯見到佢既性器官，係仔黎家~

哈哈~我一直都想生仔先，始終對婆家(王生係潮州人)有交代嘛，唔駛咁大壓力阿嘛~如果之後唔想再生都可以收工阿嘛~(雖然我想生3個)

雖則我婆家果邊都唔係話超級傳統果種，奶奶話就話生仔生女都冇所謂啦，最緊要健康，但佢之後又話，如果今胎係女咪下胎生個仔囉~

咁咪始終都係要有個仔~

再加上我自己有個家姐，王生有個阿哥，相比之下，我覺得阿哥好啲喎~

再再加上教會中多數都係生仔，好似過癮啲~

總知點都好啦，我真係好感恩神俾左個產業我地，而且仲要係我想要的性別~

真係要再一次感恩~

講返今次同阿B見面~

阿B真的活潑，照的時候總是動來動去~

而且佢好似知道我地係度講咩咁喎~

話睇下佢的性別，佢就擘大隻腳俾我地睇下佢係男定女

睇完後就立刻合返埋隻腳，玩自己的手指腳指~

聽到我地講手指又伸隻手出黎俾我地數佢啲手指~

王生見到咁不知幾興奮同開心，之後成日都係度講~

阿B咁活躍，希望之後佢唔會踢我踢得咁大力啦~